Telung dina telung wengi matane Dirwan ora bisa merem. Hawane bringsang. Kana-kanane jere matane kaya di cagak karo gantar jati. Wis pokoke ra karuan jere rasane.
Jan-jane kabeh mau ya ana sebabe. Esih kelingan pisan winginane pas esih mangsa tandur kuwe niate ya arep ora nandur pari. Ningen tembung ndilalah malah ketemu karo Sarpin nang angkruk ngarep sekolahan. Rasan-rasan masalah kebon lor lapangan sing pinggir kali serayu.
“geh… kang Dirwan,, inyong njaluk tulung kira-kira bisa apa ora???” takone Sarpin karo nyruput kopine.
“anu kon ngapa kang?? Nek inyong bisa ya masa ora tek rewangi.” Dirwan le semaur.
“kiye ngesuk dina Rebo Pon, inyong arep tandur pari kae nang kebon lor lapangan.” Sarpin njlentrehna.
“lha apa anu arep di tanduri pari?? Wong anu kebon koh di tanduri pari. Apa ora angel gole nggolet banyu nggo leb-leb.. giwinge ketone mandan dhuwur mbok sebelah lor??” takone Dirwan karo mandan kaget.
“lah ya wis ora bingung kang,, wong siki mbok ana disel sedotan banyu nggone desa.. kae wingi sing tuku karo duit PNPM. Ya wis ora bingung lah masalah banyu. Kae malah galengane wis tek gawe. Wis ana banyune mbarang. Winih ya wis tek tukokna. Wis garik mangkata yandur lah pokoke.” Sarpin gole semaur karo semringah pisan.
“ya wis ngesuk kang tek rewangi” Dirwan nyanggupi.
Sebare ngrewangi tandur nggone Sarpin, Dirwan malah bingung arep nanduri kebon wetan nggone Sarpin karo apa. Niate jane mau-maune arep nandur jagung bae sing kepenak. Sing kira-kira sepisan bae gole matun kena.
Dina Rebo wengi karo leyeh-leyeh nang risban ngarep ngumah, Dirwan mikir pisan. Wis uteke pathing gemluthuk ora genah. Dirwan mikirna kebone arep ditanduri Pari apa Jagung.. arep jagung ketone ra patut pisan wong tanggane pada pari,, arep pari susah gole ngrumat.
Ningen sidane gelem ora gelem wengi kuwe kudu njukut keputusan. Soale dina Jemuah wis kudu tandur. Nek ora tandur mengko kesuen maning gole nunggu gunggung neptu dina sing apik.
“Wis kang ora usah di pikir nemen,, wong rika kepengin nandur jagung ya nandur jagung bae.. ora usah mikir tanggane tandur apa..” Sinem, bojone Dirwan metu karo nggawa wedang kopi.
“lah ya ora patut,, wong liyane pada Pari kon dhewekan arep jagung..” semaure Dirwan.
“ya wis ngonoh bodo-bodoa njenangan arep nandur apa,, nyong wong wadon ya manut bae..” Sinem semaure karo mijeti Dirwan.
Sidane Dirwan mutusna arep nandur pari bae. Daripada ora patut mbedani dhewek ora pada karo tanggane. Masalah sewa sedotan banyu karo dai lewih ringan wong ditanggung bareng. Winih pari ya nek dipikir-pikir ora kacek adoh regane karo jagung.
Kemis esuk Dirwan meng KUD tuku winih pari P21. Ya tukune nang KUD desane soale nang kono lewih murah. Bisa diutang maning. Ya ngerti dheweklah jaman siki nggarap sawah pitung sangga kasile apa. Paribasan nggo sangu urip nganti panen ngarepe be wis maen banget. Apa maning kon bisa tuku winih sing larang.
Dina jemuah esuk Dirwan karo Sinem wis mangkat tandur. Bar subuh langsung pada rikat-rikat nggo mangkat sawah. Sinem nggendong rinjinge. Dirwan nggawa pacul karo arite. Ora keri wong loro mau nggawa tudung karo banyu nggo nginum mbok kepanasen gara-gara pas srengengene munggah urung rampung.
Sedurunge jemuahan wong loro mau wis rampung tandur. Wong loro mau pada bali meng ngumah banjur pada adus karo leyeh-leyeh. Ni ngen ora dinyana-nyana dina kuwe mendung. Wis peteng ndhedet langite arep udan.
Bar jemuahan sidane banyune tiba sekang langit. Udane deres gemrejeg kaya di senthorna sekang siwur. Di enten-enteni nganti wengi ora mandheg-mandheg. Hawane adem kepenak pisan nggo turu. Ora kejaba Dirwan karo Sinem pada turu angler banget. ya wong sing jenenge wong kesel mesti gole turu ya kepenak pisan.
Esuk-esuk gasik Sarpin ndhodog-ndhodog lawang umahe Dirwan seru pisan.
“Kang Dirwan!! Kang Dirwan!!” Sarpin melung-melung..
“Ana apa jane kang Sarpin,, kadingaren temen wayah wene wis meng umahku?” Dirwan semaur karo mbukak lawang.
“geh kang,, Cilaka pisan kiyelah.. jan cilaka..” Sarpin njawab karo grusa-grusu.
“anu ana apa??” Dirwan bingung
“kae kali serayune mbludag.. kebone dhewek wis dadi rawa.. keleb dhuwur pisan..” Sarpin crita
“Oaaalaaaahhh Biyung…. kepriwe kiyelah… nembe di tanduri malah kebanjiren.. bosok-bosok kae winihku…”’ Dirwan sambat karo lemes.
Tidak ada komentar:
Posting Komentar